Српската премиерка Ана Брнабиќ е во работна посета на Северна Македонија во Скопје.

Премиерката на Србија денеска на премиерскиот панел на самитот „Македонија 2025“ рече дека прв приоритет во овие тешки моменти треба да бидат мирот и стабилноста и регионалната соработка и дека само соработката на Западен Балкан може да отвори простор за дополнителен раст и просперитет во овие тешки времиња.

„Апсолутно прв приоритет за нас е регионалната соработка, одржувањето на мирот и безбедноста, бидејќи во овие предизвикувачки времиња и кризи, тоа е единствениот начин и една од ретките работи на кои можеме да влијаеме во регионот, а тоа е нашата соработка. Ако го зачуваме мирот и безбедноста, тогаш отвораме простор за дополнителен раст и просперитет“, рече Брнабиќ, која е во еднодневна работна посета на Северна Македонија, на премиерскиот панел „Градење просперитетна иднина: улогата на регионалната соработка“. .

Таа посочи дека втор приоритет се инвестициите во образованието, науката, истражувањето и развојот, а трет е натамошниот развој на дигитализацијата.

Брнабиќ истакна дека на тој начин можеме да го надоместиме заостанатото и изгубеното време што го имаме од 1990-тите и годините од почетокот на овој век и да обезбедиме динамичен раст.

Премиерката потсети дека Србија во 2014 година ги спроведе непопуларните мерки на фиксна консолидација, кои ги воведе тогашниот премиер Александар Вучиќ, и нагласи дека српската економија поради тоа ја помина кризата без поголеми проблеми.

Брнабиќ рече дека и годинава Србија во првиот квартал имала раст на БДП од 4,3 отсто.

Теми на средбата се натамошниот развој на пријателските односи, договор за третата заедничка сесија, иницијативата Отворен Балкан, билатералната соработка, трговската размена меѓу двете земји и проектот за железница Будимпешта-Белград-Скопје. Ова е прва билатерална средба на Брнабиќ со новиот премиер, Ковачевски.

Фокусот на овогодинешниот самит е дигитализацијата и развојот на дигиталните вештини, регионални и глобални теми.

На самитот секоја година учествуваат владини претставници, компании кои работат во регионот, членови на дипломатскиот кор и меѓународни организации, како и членови на академската заедница на граѓанското општество.

Самитот започнува денеска и ќе трае до 19 мај, а ќе го затвори претседателот на земјава, Стево Пендаровски.

Ова е четврти пат Брнабиќ да престојува во официјална посета на Северна Македонија, а последен пат беше во јули минатата година, кога учествуваше на Преспанскиот форум во Охрид, на кој се собраа лидерите од Западен Балкан и претставници на ЕУ.

 


Сподели на социјалните мрежи
  • gplus

TATKOVINA.INFO